សៀមរាប៖ កម្មវិធីជិះកង់អង្គរដោយក្រុមកីឡាសេនាយុត្តិធម៌នៅខេត្តសៀមរាប បានរៃអង្គាសថវិកាបានចំនួន ៥៥៥លានរៀល (ប្រមាណ ១៣ម៉ឺន ៨ពាន់ដុល្លារអាមេរិក) ដើម្បីរៃអង្គាសថវិកាជូនមន្ទីរពេទ្យជ័យវរ្ម័នទី៧ (គន្ធបុប្ផាទី៣)។

ថ្លែងក្នុងកម្មវិធីពិសារអាហារពេលល្ងាចថ្ងៃទី១៨ ខែមីនា ឆ្នាំ២០២៣ រដ្ឋមន្ត្រីយុត្តិធម៌ លោក កើត រិទ្ធ បានគូសបញ្ជាក់ថាកម្មវិធីជិះកង់អង្គរនេះ មិនត្រឹមតែផ្តល់ឱ្យអ្នកចូលរួមទទួលបាននូវសុខភាពល្អប៉ុណ្ណោះទេ ប៉ុន្តែថែមទាំងបង្កើតឱ្យមាននូវស្មារតីសាមគ្គីភាព ភាតរភាព និងមោទនភាពសម្រាប់អ្នកចូលរួម ក៏ដូចជាបានចូលរួមចំណែកក្នុងសកម្មភាពមនុស្សធម៌ ជាពិសេសការបរិច្ចាគថវិកាពីអ្នកដែលបានចូលរួមជិះកង់ផង និងអ្នកដែលមិនបានចូលរួមជិះកង់ផង។

កម្មវិធីនេះក៏មានការអញ្ជើញចូលរួមពីសំណាក់ថ្នាក់ដឹកនាំ និងមន្រ្តីរាជការនៃក្រសួងយុត្តិធម៌ សមាជិកនៃឧត្តមក្រុមប្រឹក្សានៃអង្គចៅក្រម ថ្នាក់ដឹកនាំ ចៅក្រម និងព្រះរាជអាជ្ញានៃសាលាជម្រះក្តី និងអយ្យការអមសាលាជម្រះក្តីគ្រប់ជាន់ថ្នាក់ ថ្នាក់ដឹកនាំ និងមេធាវីនៃគណៈមេធាវីនៃព្រះរាជាណាចក្រកម្ពុជា, ក្រឡាបញ្ជី និងអ្នកវិជ្ជាជីវៈច្បាប់ផ្សេងទៀតព្រមទាំងសមាជិក សមាជិកានៃក្រុមកីឡាសេនាយុត្តិធម៌ ក្រុមកីឡាទន្សាយអង្គរ និងក្រុមកីឡាគ្រុឌមានជ័យ ជាដែលមានចំនួនប្រមាណ ៥៦០រូប៕